कर्णाली प्रदेशको राजधानी सुर्खेतको वीरेन्द्रनगरमा प्रथम सडक खाना महोत्सव सुरु भएको छ ।
प्राङ्गारिक तथा रैथाने बाली दिवसको उपलक्ष्यमा होटल व्यवसायी महासंघ, सुर्खेतको आयोजना र कर्णाली प्रदेशका भुमी वयवस्था, कृषि तथा सहकारी मन्त्रालय, कृषि विकास निर्देशनालय, प्रधानमन्त्री कृषि आधुनिकीकरण परियोजना, कृषि क्षेत्र विकास कार्यक्रम, वीरेन्द्रनगर नगरपालिका र कृषि क्षेत्रका विभिन्न संघसंस्थाको सहकार्यमा यहि फाल्गुन ६ र ७ गतेका लागि सो कार्यक्रमको आयोजना गरिएको हो ।
२०७४ साल फाल्गुन ०६ गतेका दिन कर्णाली प्रदेश सरकारले यस प्रदेशलाई प्राङ्गारिक तथा रैथाने प्रदेश बनाउने घोषणा गरेको दिनलाई प्राङ्गारिक तथा रैथाने बाली दिवसको रुपमा मनाउदै आइरहेको कृषि मन्त्रालयका प्रवक्ता एवम् कृषि प्रसार अधिकृत धन बहादुर कठायतले जानकारी दिए ।
हरेक वर्ष सभा समारोहको रुपमा मनाउदै आइरहेको सो दिवस यस वर्ष भने कृषि सम्वद्ध निकायहरुको समन्वयमा अलि फरक तरिकाले मनाउन लागिएको हो । वीरेन्द्रनगरको व्यस्त सडक मध्यको डिएनपी डाडाको भागमा रहेको सडकमा सो महोत्सव संचालन गरिएको छ ।
महोत्सवमा प्रदेश भित्रका रैथाने बालीहरु र तिनीबाट बनेका खाद्य बस्तुहरुको प्रदर्शनी स्टलहरु राखिएको छ ।
सुर्खेतको वीरेन्द्रनगर मङ्गलगढीबाट बाजागाजा सहित निकालिएको र्याली महोत्सव स्थलमा गएर कार्यक्रममा परिणत भएको थियो ।
भूमि व्यवस्था, कृषि तथा सहकारी मन्त्रालयका मन्त्री विनोद कुमार शाहले रैथाने र प्राङ्गारिक बस्तुहरुको प्रबर्द्धन र प्रदेश सरकारको नीति बमोजिम कर्णाली प्रदेशलाई अर्गानिक प्रदेश बनाउने योजनामा टेवा पुगोस् भनि मन्त्रालय लगायतका निकायहरुबाट संचालन गरिएको सो कार्यक्रममा उपस्थित सबैलाई स्वागत गरेका गरेका थिए ।
कार्यक्रमको उद्घाटन गर्दै कर्णाली प्रदेश सरकारका मुख्य मन्त्री यामलाल कंडेलले विभिन्न स्टलहरुको अवलोकन गरि देखाउनका लागि मात्र नभएर कृषकको जीवनस्तर उकास्नका लागि परिणाममुखी कार्य संचालन गर्न आग्रह गरे ।
त्यस्तै मुख्यमन्त्री कडेलले रैथाने बालिहरु हिजो यस प्रदेशका जनताहरुको जीवन निर्वाह गर्ने प्रमुख स्रोत भएता पनि आज त्यस्ता वस्तुहरु ठुला ठुला होटेलहरुमा मात्र पाइनु र अक्सर रमाइलोका लागि मात्र खाने प्रचल बढ्दै गइरहेकाले फरक खालको सडक कार्यक्रमको आयोजना गरि रैथाने बस्तु र खानाको प्रचार गर्दा प्रदेश सरकारको प्राङ्गारिक प्रदेश बनाउने लक्ष्य प्राप्तिका निम्ति टेवा पुग्ने विश्वास व्यक्त गरे ।
उद्घाटन सत्रको समापन गर्दै भूमि व्यवस्था, कृषि तथा सहकारी मन्त्रालयका सचिव प्रशुराम रावतले मन्त्रालयको प्रदेशलाई प्राङ्गारिक प्रदेश बनाउने लक्ष्यलाई टेवा पुर्याउने उद्देश्यले यो पटक सडक केन्द्रित फरक खालको कार्यक्रम आयोजना गरिएको र यस कार्यक्रमबाट धेरै भन्दा धेरै जनहरुमा रैथाने बाली र बस्तुहरुको बारेमा जानकारी पुग्ने अपेक्षा व्यक्त गरे ।
महोत्सवमा विभिन्न मन्त्रालयका मन्त्रीहरु, योजना आयोगका उपाध्यक्ष सुर्यनाथ योगी, विभिन्न संसदिय समितीका संयोजक एवम् सदस्यहरु, कृषि सम्बद्ध निकायका प्रमुख-प्रतिनिधिहरु, होटेल व्यवसायीहरु, होटेल व्यवस्थापन विषयमा अध्ययनरत विद्यार्थीहरु लगायतको सहभागिता रहेको थियो ।
साझको समयमा विशेष साङ्गितिक कार्यक्रम रहने र फाल्गुन ७ गतेसम्म सो महोत्सव संचालन गरिने आयोजकले जानकारी दिएको छ ।
कृषि रैबार । ७ फाल्गुन २०८१, बुधबार