सार्वजनिक सवारीमा यात्रा गर्दा कहिले काहीँ तपाइले केही सामान छुटाउनु भएको छ होला । हराएका सबै सामान फिर्ता पाएको वा सवारी चालकले विरलै मात्र फिर्ता दिएको घटना सार्वजनिक भएको हुन्छ । यस्तै एउटा घटना सुर्खेत जिल्लाको सदरमुकाम विरेन्द्रनगरमा भएको छ । विरेन्द्रनगर नगरपालिका वडा नम्बर ०६ बस्ने स्वस्तिमा आचार्य शुक्रबार घरबाट बसपार्क जाने बेला एउटा अटोमा रु।१२ हजार बराबरको कपडा र १ लाख ३० हजार रुपैयाको रिचार्ज कार्ड भएको झोला बिर्सिन । त्यति धेरै मूल्य बराबरको सामान हराएपछी उनले जिल्ला प्रहरी कार्यालय, सुर्खेतमा निवेदन पेश गरिन ।
सामान हराएको ५ दिन पछि आज जिल्ला प्रहरी कार्यालयबाट सामान भेटिएको र उक्त सामान बुझिलिन कार्यालय आउनु भनेर खबर गरियो । कार्यालयमा जादा अटो नम्बर भे।१।ह ४५८७ का चालक डिल बहादुर विश्वकर्मा आफुले अटोमा भेट्टाएको सामान सहित कार्यालयमा उपस्थित भइसकेका थिए ।
झट्ट हेर्दा कुनै कहानी जस्तो घटना भए पनि हराएको सामान बिरलै मात्र फिर्ता पाउने गरेको सन्दर्भमा उक्त सामान भेटिने कुनै पनि आश नरहेको स्वस्तिमाले बताइन् । यता अटो चालक डिल बहादुरले सानातिना घटना घट्ने गरेको र सम्बन्धित यात्रुलाई समयमानै दिने गरेको भए पनि यति ठूलो परिमाणमा सामान आफुले पहिलो पटक भेट्टाएको र सामान खोजे यात्रुलाई उपलब्ध गराउने सोचमा घरमा लगेर सुरक्षीत राखे । धेरै दिनसम्म पनि कसैले नखोजे पछि आज आफैले जिल्ला प्रहरी कार्यालयमा बुझाएको र सम्बन्धित व्यक्तीलाई उक्त सामान सकुसल फिर्ता दिन पाउँदा खुशी व्यक्त गरे ।
हराएको सामान फिर्ता पाउने यस्ता घटना विरलै सुन्न पाइए पनि आफ्नो सवारी साधनमा भेट्टाएको सामान समयमानै चालकले प्रहरीको जिम्मा लगाइ दिएको अवस्थामा पिडितलाई पनि सहजता हुने र प्रहरीलाई पनि खोजी कार्यका लागि जनशक्ति थप गर्नु पर्ने समस्या नहुने कार्यालयका प्रवक्ता, प्रहरी नायव उपरीक्षक सुरज कार्कीले बताउनु भयो ।
कृषि रैबार । २० मंसिर २०७९, मंगलवार